Um ritgerðir.

Ég er að bagsast við að skrifa 3. ritgerðina sem ég þarf að skila fyrir 18:00 þann 20. des. 2 eru búnar (á bara eftir að prenta). Er dauð feginn að hafa ekki trassað þetta neitt að ráði. Þarf samt að skrifa u.þ.b 20 bls. í viðbót á næstu 6 dögum þannig að það er lítill tími til þess að spá í jólin enn sem komið er. Síðan þegar það er búið þá tekur fjórða stóra ritgerðin við sem er lokaverkefni í "international law" áfanganum. Ég hef frjálst val um hvað ég skrifa sem er ekkert betra, á ennþá eftir að finna mér efni og þarf að vera búinn að tilkynna kennaranum efnið og fá það samþykkt fyrir 21. des. Það þýðir ekkert hangs, ætla reyndar eitthvað út úr húsi í kvöld en stefnan er samt tekin á hóflegt útstáelsi þannig að ég geti verið sestur við skrif klukkan 8 í fyrramálið.
Er líka farið að styttast í jólafrí og ég var að skoða flugmiðann minn og samkvæmt honum er ég væntanlegur á klakann klukkan 22:20 á Þorláksmessu. Jól í faðmi fjölskyldunnar er skylda og nýjársgleði með vinum er nauðsyn. 3. janúar er það svo Eistland aftur í 2 vikur til þess að fara í próf ofl..

Hasar framundan.
Kv,
Bjössi

Um brjálæði.

Er á fullu að lesa og skrifa þessa dagana. 3 ritgerðir sem ég þarf að skila 2o. des. Búinn með eina og hálfa og vika til stefnu, fluggírinn fundinn og því lítið um skrif hér undanfarið. Var duglegur í gær óvænt útstáelsi á fimmtudag, föstudag og laugardag. Kvaddi Annu á fimmtudaginn, hitti Ellu á föstudagskvöldinu og ætlaði út með Öldu á laugardaginn en það var ekkert stuð eftir í orkutanknum hjá okkur þannig að hún fór snemma heim og ég fór heim þegar hætti að rigna (var í rússkinnsjakka sem ég vildi ekki eyðileggja). Dagurinn tekinn snemma á sunnudaginn og lært eins og lífið lægi við. Svaf síðan illa í nótt og byrjaði daginn verr. Eldsnemma, illa sofinn og úrillur, ennþá hálf sofandi ruglaðist ég á tannkremi og sjampói. Heilræði frá Bjössa frænda nr 1. EKKI BURSTA TENNURNAR MEÐ MENTHOLSJAMPÓI. Dagurinn lagaðist síðan þegar fór að líða á hann og gekk bara ágætlega þegar ég lít til baka.