Um the law of the sea

Búinn að lesa 200 bls af þessari afdalavellu. Nú síðast var ég að lesa um rifrildi hr. Sjálfstæðs ríkis við nágranna sína út af berjarunna í garðinum sem teygði sig yfir á lóð nágrannans og nágranninn taldi sig eiga berin sem væru sín megin við miðlínuna milli húsanna. Einnig var kafli um frú Hentifánaskútu sem var alltaf að sparka bolta yfir grindverkið hjá frú Efnahagslögsögu og tíndi berin í garðinum þegar hún fékk að sækja boltann.

Spennandi stöff.

Um ensku, kínverja og lélegar ástarsögur.

Var í enskutíma í morgun. Ég og kínverjarnir vorum í stöðuprófi í síðustu viku og þegar kennarinn kemur inn í tímann í dag labbar hún upp að mér og segir "We have a problem!". Mér datt fyrst í hug að ég hefði einhvernveginn svindlað á stöðuprófinu og væri þessvegna í vandræðum. Ég fann það hinsvegar út að kínverjunum hafi ekki gengið mjög vel á prófinu en prófið mitt hafi verið "perfect". Mér var því tjáð að nærveru minnar væri ekki óskað í tímum en til þess að fá einingarnar ætti ég að fara á bókasafnið í hverri viku, finna lögfræðibók á ensku, lesa hana og kynna efnið og lögfræðiorðin þá sérstaklega munnlega fyrir kínverjunum sem væru að fara læra lögfræði um leið og þeir yrðu spjallfærir á alvöru tungumáli. Ég fer sáttur út og upp á bókasafn og næ mér þar í spennusöguna "The law of the sea" sem fjallar á æsilegann hátt um ást, hatur, svik og ofbeldi hjá aðalsögupersónunum, Fr. Efnahagslögsögu og Hr. Útlendum Skipstjóra. Hvað um það, þegar ég er kominn í strætó fór ég að hugsa um hvað ég væri að gera og hvað ætlast væri til af mér og ég endaði á því að spyrja sjálfan mig eftirfarandi spurningu: "Var verið að gera mig að aðstoðarkennara?"

Um "Nákvæmlega"

Vaknaði snemma í gær morgun og drattaðist niður í bæ. Erasmus fólkið hafði skipulagt dagsferð fyrir okkur skiptinemana til Paldiski. Vorum komin þangað um hádegi og fórum að labba um þennan eyðilega bæ sem gæti verið hvar sem er í heiminum svosem. Lítið að sjá þarna, þetta er bær sem hefur þjónað herstöð þarna í mörg hundruð ár, fyrst fyrir svía, síðar rússa, þjóðverja og loks sovétveldið. Eftir að Eistland lýsti yfir sjálfstæði forðaði Rússneski herinn sér fljótlega og Eistar hafa ekki lagt sig mikið fram við að breyta 50 ára hersetu og kúgun í túristadæmi. Frekar leiðinleg ferð bara en það var svo mikið labb að það voru allir dauð þreyttir þegar þessu lauk um 7 leitið. Líkamsrækt var það sem ég fékk út úr þessu.
Hvað um það okkur Öldu var boðið að fara út á lífið með finnunum um kvöldið en Alda var svo uppgefin að hún lagði ekki í það. Ég, Annukka, Kaja og Laura fórum því aðeins út í gærkvöldi. Ekki mikið að segja frá svo sem þar sem drykkjan náði aldrei þeim hæðum að skandalar sköpuðust. Finnsku stelpurnar töluðu hinsvegar heilmikla finnsku sín á milli af einhverjum ástæðu þannig að ég fékk þær til að kenna mér að segja "nákvæmlega" á finnsku þannig að ég gæti valið góð augnablik í samtölum þeirra til að vera sammála. Kom heim óvenju snemma miðað við að hafa verið úti með finnum.

Hvað varðar klukkið þá leiðist mér svona klukk þannig að ég ætla að gera þetta öðruvísi. Ég ætla að gefa fleiri "staðreyndir" um sjálfan mig, sumar sannar og sumar uppspuni, það er ykkar að ákveða hvað er hvað.

1. Ég er fleiri sentimetrar en kíló.
2. Ég er með tannlæknafóbíu.
3. Ég dansa ekki, stelpur dansa.
4. Ég veit betur en þú.
5. Mér leiðist að skrifa svona lista.
6. Mér þykir bjór góður.
7. Uppáhaldsliturinn minn er glær.
8. Ég er ekki með hár á bakinu.
9. Mér leiðast bækur sem enda ekki.
10. Uppáhaldsbókin mín er "Depill fer í bað" (buslubók)
11. 80's tónlist er æði.
12. Ég drekk ekkert sterkara en vodka.
13. Ég er með ofnæmi fyrir leiðinlegu fólki.
14. Ég synti eitt sinn í kringum Þingvallavatn.
15. Ég ætla að bjóða mig fram til forseta.
16. Mjallhvít er ástæða þess að ég borða ekki epli.
17. Mér finnst assnalegt að "8" á hlið sé stærri tala en "9" á hlið.
18. Ég hata smáralindina og kringluna.
19. Ég er er ekki flughræddur, ég er fallhræddur.

Ég hef áhveðið að klukka engan þar sem það er sennilega búið að klukka ALLA íslendinga núna.