Um minnkandi snilli mína í rúminu.

Ég veit ekki hvað er í gangi. Kannski er það fertugsaldurinn, kannski er það loftslagið. Hver sem ástæðan er þá hefur færni mín í rúminu minnkað all svakalega við flutninginn til Eistlands. Ég er ekki sáttur við þetta. Ég var kominn með það orðspor að vera svakalegur í rúminu. Timburhús nötruðu heilu og hálfu næturnar af mínum völdum. Ég gat borið mig saman við þá bestu í heiminum, skipti ekki neinu máli hvar, hvenær eða í hvaða stellingu. Ég hafði það mikla yfirburði að ég talaði um getu mína í 3. persónu: "Björn Hjaltason hefur gert svefn að listgrein". En ég sef ekki jafn vel í Eistlandi. Ég kenni hitanum um.